「JR上野站公園口」流浪漢的啟示
刊載「台文戰線」第71期2023-7月 陳榮廷 2023-5-14 老母節 三峽
冊名： 「JR上野站公園口」 作者：柳美里 翻譯：章蓓蕾 聯經出被社
2020年11月，獲得美國國家圖書獎的「翻譯文學部門獎」
2023年5月初和查仔囝去「台大」附近的冊店買冊，無意中佇「聯經出版社」冊店，看著「jR上野站公園口」這本冊。我有一个朋友拄蹛佇日本「上野」，怹公司離車頭行路免10分鐘，所致「上野公園口」是數十年前我當leh出入日本上捷（tsia̍p)經過、迌（tshit-thô)，上熟似的所在，suah引起我的注意這本冊是–leh寫啥？掀看覓才知是leh講「流浪漢」的代誌。會記之佇1988年有一個月的「加州大學long beach 分校」遊學的「社會學」課，有提出「流浪漢」這的主題。知影紐約、東京⋯等大都市市府，lóng面對欲按怎處理的問題。捌遮捷出入「上野公園口」的人，竟然毋知有過四，五百的「流浪漢」長期佇遮leh生活。
成做流浪漢–ê起源
看起來，歐美學者對會成做「流浪漢」的起因，較偏向有一種人毋受傳統社會人際無形的約束、抗議資本主義看懸無看低，hông怹看無目地的散赤人。欲我按日本作家「柳美里」冊裡的理解，伊透過冊裡的主角「森阿和」講：阮過去抑有親人、有家己的家庭，無人一開始就蹛佇紙箱佮防水布的「小厝仔」成做「流浪漢」，會變成按呢是有原因个，有人是借了高利貸落跑、有人因為偷提錢、抑是拍人進出監獄家人放棄伊、有人公司失業hōo某要求離緣⋯。大體欲講會成作一个「流浪漢」，若毋是戰爭破壞經濟生活的秩序、大自然災難的陷害（地震、火災、水災⋯等）、城鄉討生活的精差、抑是家庭發生重大事件的變掛，才會致使一寡人放浪家己，甘願放掉伊佮厝裡親人的連結，孤一人去弄溜liān。
厝裡親人前後過身，無愛拖累囝孫，
咱就按冊裡「森阿和」成做「流浪漢」的種種講起。伊早前mā有一个齊全–的家庭，太太「節子」、大後生「浩一」，查仔囝「洋子」，外孫女「麻里」。60歲才按北部結束伊幾拾年的外地作工的日子，轉來「八澤村」厝裡團圓。真不幸「浩一」21歲佮「節子」65歲先後lông佇睏眠中過身了，「洋子」料理伊的生活起居，後來就由外孫女「麻里」接班看顧，日常無所不至安搭。伊想講：「麻里」才拄21歲，袂使為著我這个外公綑綁佇厝裡，伊怎留一張紙條仔寫：真抱歉，外公不告而別，欲來去「東京」袂koh轉來厝裡，毋免揣(tshuē)我。伊怎行去「鹿島站」坐上「常磐線」，佇東京的「上野站」落車，行入公園口。當時伊欲70歲矣，才成做一个老耄耄(lāu-moo-moo)的「流浪漢」。
幾次大「地動」真濟人流離家鄉，上野公園成做避難所在
「森阿和」是怹七代前的先祖，按日本的東北所在盤山過嶺，行路60工才來到較南爿「鹿島相馬」的「八澤村」，規个鄉族lông信奉「真宗門」，對人的生死、平時的禮俗比當地的「神道」，koh較順其自然。因為生活困苦，伊自12歲就隨老爸、阿叔出外地作工。伊1933出世拄過1952年的智利9.5級的大地動，引起日本的「海漲～hái-tiòng」（海嘯）六公尺懸，死傷真濟人；伊拄過1964東京奧運結束後，推動了東北地方佮北海道各地的公共建設，伊出外攑十字鎬鍤土（tshiah-thóo)作工，到kah伊60歲1993才轉來故鄉歸家，無偌久，大漢囝佮查某人前後齊（tsiâu)過身去，伊怎去東京作工，親像一般的（it-pan-tik)來東京作工的散赤東北人，最後真濟人行入「上野站公園口」，成做「流浪漢」。
做一个「流浪漢」–ê思考、感受
昭和35年2月23日，伊聽到電台播出：「下晡四點15分，皇太子妃殿下生落親王，母子平安」。伊的後生仝彼工出世，為著慶祝，怎取親王的名第一字，號做浩一，卻是活到21歲爾爾就過身。想到遮，伊難免koh一擺耳孔會聽著電台傳來的播音⋯。伊一直按呢想：只要離開這的世界，就會使和往生的故人重逢、只要離開世間，就會頓悟，到底活著佮死去的意義？毋過，若清醒過來，卻是發覺又koh轉來這个公園，無去別位，mà無得到啥解答，自己已失去存在的可能，干焦(kan-na)，留佇生命外側，伊繼續思考、感受⋯貧窮是一種罪，這種罪帶來的懲罪也是貧窮，只好去犯罪，去流浪。
「流浪漢」long有無相像–ê過去，生活相像愛有尊嚴
食老孤倔（koo-ku̍t)無某無猴，生活起居獨來獨往，佇長歲壽的年代愈來愈流行。卻是罕得聽講有人煞成做「流浪漢」四界去浪溜lian。隱姓埋名流浪四界去，抑是揣固定地點隱居、抾人食賰（tshún)落來的剩菜(sīng-tshài)過活，照這本冊的講法，東京市幾百間的餐廳盈暗收攤的時，攏會好禮仔kā賰落來的菜飯橐（lok)佇塑膠袋仔，後尾門開開等「流浪漢」來提走。「森阿和」所講个：佮伊相仝(sio-kāng)歲數的「阿茂仔」，常在會kā公園裡–的博物館，美術館，石碑的建置、遷徙（tshian-suá)的歷史講予知，甚至，會欲招伊去附近的「圖書館」看報紙。「森阿和」心肝認定「阿茂仔」是一个捌字的知識份子，範勢，早前是佇公家做過代誌。伊聽「阿茂仔」講：伊是為著做過一件無應該做的代誌，才斷絕親人來遮流浪。
咱台灣，干焦，佇各地的火車頭，看會著零零散散（lan-lan-san-san）的「流浪漢」，窮實，觀感無啥好。毋過，多元的社會，咱必要有較多元寬闊的腹腸。毋知，咱的地方政府有啥對策去安置？連（liâm)日本，歐美long無啥法度解決的社會問題，一味的追逐趕除，敢是辦法？佇這个經濟發展優先，事事變化萬千的年代，咱若理解「流浪漢」的起源，知影有怹的存在是必然个。怹佇自由的空間避風避雨是老天的賞賜，毋通鄙相(phí-siùnn)怹，愛尊重怹生存的方式。
～沒有人是一開始就住在紙箱和防水布下的。窮忙一生之人，如遊魂穿梭於繁華人流，探問悲傷如花碎滿地～翻譯：章蓓蕾